Orosius, I
Edition: Karl Zangemeister, 1882
Caput 13
1 Anno ante urbem conditam DLX atrocissimum inter Cretenses atque Athenienses certamen fuit, ubi populis utrimque infeliciter profligatis cruentiorem victoriam Cretenses exercuerunt;
2 qui nobilium Atheniensium filios Minotauro, utrum fero homini an humanae bestiae aptius dicam nescio, devorandos crudeliter addicebant atque informe prodigium effossis Graeciae luminibus saginabant.
3 isdem diebus Lapithae et Thessali famosis nimium certavere conflictibus.
4 sed Thessalos Palefatus in libro primo Incredibilium prodit ipsos a Lapithis creditos dictosque fuisse Centauros eo, quod discurrentes in bello equites veluti unum corpus equorum et hominum viderentur.