monumenta.ch > Hieronymus > 141
Hieronymus, Epistulae, 4, 140. AD CYPRIANUM PRESBYTERUM. <<<     >>> 142 AD AUGUSTINUM.

141[Al. 80. Scripta forte an. 418.] [Isthaec Epistola in Mss. duobus Monast. Vindocinensis, referentibus Benedictinis, proxime superiori subditur, interiectis tantum his tribus verbis, Iam post suscriptionem. Multi utroque claudicant, etc., quae nobis coniunctio in unam cum primis probatur, quibus minime est verosimile, tam breve dictatum, quo non nisi aenigma unum et alterum renuntiatur, sic abs Hieronymo seorsim scribi ad Augustinum potuisse. Ad haec scriptionis ingenium, ac series hanc superioris esse veluti appendicem probant. Sed cum in vulgatis huc usque omnibus in duas dispertiantur, atque ipsi S. Augustini editores, quibus eorum Mss. fides perspecta erat, hanc ab illa non utcumque, sed octo annorum interstitio separent, antiquae auctoritati contraire non placuit. Heic tamen suo loco subdimus, ut nativo ordini quoad fieri praestabat, consuleremus.]. AD AUGUSTINUM. HIDE APPARATUS

1  [Gratulatur eius industriae, per quam haereticorum factionibus obstiterit, eaque in re suum quoque studium testificatur.]
Domino sancto ac beatissimo Papae AUGUSTINO HIERONYMUS. Omni quidem tempore beatitudinem tuam, eo quo decet honore, veneratus sum; et habitantem in te dilexi dominum Salvatorem: sed [al. et] nunc, si fieri potest, cumulo aliquid addimus, et plene complemus, ut absque tui nominis mentione, ne unam quidem horam praeterire patiamur, qui contra flantes ventos ardore fidei perstitisti. Maluisti, quantum in te fuit, solus liberari de Sodomis, quam cum pereuntibus commorari. Scit quid dicam prudentia tua. Macte virtute, in orbe [al. urbe] celebraris. Catholici te conditorem antiquae rursum fidei venerantur atque suspiciunt; et, quod signum maioris gloriae est, omnes haeretici detestantur: et me pari persequuntur odio; ut quos gladiis nequeunt, voto interficiant. Incolumem et mei memorem te Christi Domini clementia tueatur, domine venerande et beatissime Papa.
Hieronymus HOME

bnf446.32 bsb4610.200 hab179.216