Walafrid Strabo, Vita Sancti Mammae, CAPUT IV. Quemadmodum ex praecepto domum in monte construxerit, et a silvicolis sit gregibus honoratus.
1 | Ille pii praecepta Patris veneranda secutus, |
2 | Montem conscendit, praecisisque undique solers |
3 | Arboribus, struit antra magis quam daedala celsis |
4 | Tecta tholis, simul aedificans altare Tonanti; |
5 | Postque laboris onus, sancto sudore fluentes |
6 | Artus composuit sessum librumque revolvit; |
7 | Dumque sacros versus depromeret ore beato |
8 | Silvestres venere greges, animalia iussu |
9 | Acta Dei, fixoque genu patienter adorant. |
10 | Quo recitante tacent, et acutis auribus astant, |
11 | Post verbum, cum lustra mares silvestria cuncti |
12 | Expeterent, quasi carnalem doctoris ad usum |
13 | Femineos liquere choros, quis lacte tumebant |
14 | Ubera tota novo, domitis sine lite cohaerent, |
15 | Quae sancti sociavit honor; si dicere dignum est, |
16 | Sic edocta suo servit Macedonia Paulo. |
17 | Dat carnale bonum per quem coelestia sumpsit. |
18 | Miremur virtutis opus, doleamus iniqua |
19 | Brutaque corda hominum; verbum faciente magistro, |
20 | Intentae stupuere ferae: at ratione vigentes |
21 | Auditum strepitu sensum sermone retundunt; |
22 | Dat fera mercedem, nos impia probra docenti, |
23 | Hinc fera non meritum, sed habet mens dura reatum. |