Walafrid Strabo, Vita Sancti Mammae, CAPUT III. Quomodo in campum a Domino vocatus virgam et Evangelium invenerit.
| 1 | Haec inter campum Domini petat ore monetur, |
| 2 | Et pergens: Quo, Christe, vocas, quo te sequar, inquit? |
| 3 | Fulgida continuo per coeli virga serenum |
| 4 | Voxque simul cecidit: Tibi mittitur, accipe, Mammes, |
| 5 | Et quodcunque tibi suadet mens sancta petendum, |
| 6 | Hac dabitur. Faciem tum laetus ad aethera tollens, |
| 7 | Fert grates Domino; mox virga ut contigit occas |
| 8 | Campi, Evangelium miro datur ordine sanctum: |
| 9 | Quod postquam sumpsit supplex et legit apertum: |
| 10 | Credo, sciens virga pastorem codice magnum |
| 11 | Doctorem institui, Dominum veneranter adorans, |
| 12 | Et quis, ait, dictis, ostende, monebitur istis? |
| 13 | Donasti iam velle loqui, da credere verbis |
| 14 | Corda aliena meis. Dixit, vocemque loquentis |
| 15 | Audiit: Accelera, Mammes, montemque revisens |
| 16 | Mox parvam compinge domum, dabo deinde iubendo |
| 17 | Haec sacra dicta, quibus doctor capienda ministres. |