1 | Hoc itaque ita rebus humanis subtracto, praedicti comites sublatas sancti loci possessiones retinentes, Ioannem quemdam monachum de proximo monasterio in eius locum subrogaverunt: ac deinde, ut suae tyrannidis crimen augmentarent, Sidonium Constantiensis Ecclesiae praesulem instigarunt ut idem monasterium episcopii partibus subiicere studeret. Et hoc idcirco fecerunt ut eo licentius, ipso machinationibus eorum favente, ea quae iniuste abstulerant, retinere potuissent. |
2 | Pontifex igitur cum suasionibus eorum libenter praeberet assensum, monasterium ingressus, fratres opprimere et eumdem locum episcopii rebus subiicere molitus est. Porro fratres, dum potentiae illius resistere non auderent, maluerunt eius ditioni parere quam tot adversitatibus implicari. Sed sequentia probant quam perverse egerit, qui per avaritiae morbum sacri loci privilegium ausus est violare. |