Walafrid Strabo, Vita Sancti Galli, 2, 2

monumenta.ch > Walafrid Strabo > 2
Walafrid Strabo, Vita Sancti Galli, 2, PRIMUM. <<< >>> III.

Walafrid Strabo, Vita Sancti Galli, 2, CAPUT II. [Qualiter Boso episcopus corpus eius reposuerit.]

Audiens Constantiensis Ecclesiae praesul, nomine Boso [Hic adversus Walafridi calculum Goldastus opponit Hermannum Contractum, ut qui Bosoni Constantiensi episcopo Ernfidum dicat successisse anno 736, quo anno in vivis esse non potuit Boso, si cladem ab Othwino illatam iam episcopus vidit. Longe validius argumentum desumi posset ab aetate Magnoaldi et Theodori, sancti Galli discipulorum, qui ad octavum saeculum pervenire nequiverunt. Verum apud Hermannum non Boso, sed Audonius Ernfridum habuisse successorem legitur: nec si aliter legeretur, Walafrido praeferenda esset Hermanni longe posterioris auctoritas. In episcoporum Constantiensium catalogo, quem Gabriel Bucelinus Benedictinus, vir multorum librorum, ordinavit, Boso, alio nomine Obihardus (seu Obbaldus), post Ioannem beati Galli discipulum recensetur, atque inter Bosonem et Ernfridum episcopi sex, postremus Audonius seu Ausonius inseruntur.], sepulcrum beatissimi Galli violatum esse ab hostibus, nullumque remansisse in cellula, praeter duos fratres Magnoaldum et Theodorum, qui sacri corporis reliquias tumulo restituere potuissent, venit illuc cum clericis suis, et invenit cellulam desolatam, sancti Patris corpus de sepulcro eiectum, altaria nudata, duosque fratres qui remanserant spoliatos iacentes in oratorio, et magnitudinem calamitatis gemitibus et lacrymis protestantes.

Et misericordia motus, coepit eos consolari multiplicibus verbis, illam replicans Psalmistae sententiam qua dicit: In tribulatione invocavi Dominum, et exaudivit me in latitudine. Dominus mihi adiutor, non timebo quid faciat mihi homo [Psal. 117]. His dictis, sumens loculum in quo sanctum corpus erat, posuit super terram inter parietem et altare, et desuper, ut moris est, arcam altiorem construxit, fossam vero terra replevit. De suo quoque fratribus vestimenta largitus est, et unde alerentur disponens, ad episcopium remeavit.