Walafrid Strabo, Vita Sancti Blaitmaici, V. BLAITMAICI VIRTUTES; PRAEFECTURA.
| 1 | Mox miro a cunctis semper complexus amore, |
| 2 | Cunctorum studuit fieri dicique minister, |
| 3 | Mente humilis, linguae custos, et norma bonorum. |
| 4 | Verba Dei capiens sitienti corde libenter, |
| 5 | Discendi studiosa gerens praecordia, libris |
| 6 | Perdidicit divina animo documenta sagaci. |
| 7 | Sicque vigens doctrinarum morumque nitore, |
| 8 | Agmina multorum rexit veneranda virorum; |
| 9 | Exemplis sua dicta probans, vanosque favores |
| 10 | Pro nihilo ducens: cui laus et gloria solum |
| 11 | Christus erat, Christus sermo, Christus documentum. |
| 12 | Pax clypeus, lorica preces, patientia bellum, |
| 13 | Mucro Dei verbum, spes et dilectio totum. |
| 14 | Nulli detraxit, nulli convicia struxit. |
| 15 | Singula quid fari per singula verba necesse est, |
| 16 | Cum quidquid legitur virtutum, rite teneret, |
| 17 | Et quidquid vitii monstrat Scriptura, caveret |
| 18 | Omnibus existens feliciter omnia factus, |
| 19 | Ut cunctos faceret Christo sua lucra referre. |
| 20 | Utilis et prudens servus per ovilia Christi, |
| 21 | Tempore qui certo mensuram farris opimi |
| 22 | Conservis tribuens, radiavit ubique fidelis. |