Walafrid Strabo, Vita Sancti Blaitmaici, II. BLAITMAICI PATRIA, REGIUM GENUS.
| 1 | Regali de stirpe satus, summumque decorem |
| 2 | Nobilitatis habens, florebat regius haeres |
| 3 | Iste Dei sanctus vitam ducendo pudicam; |
| 4 | Quodque solet raro factum et non saepe videri: |
| 5 | Quanto maior erat, tanto deiectior ibat. |
| 6 | Spes patriae, fortuna patris, rex ille futurus; |
| 7 | Iudicio iustus, prudens, et corpore castus, |
| 8 | Sobrius, ornatus, iocundus, cautus, honestus: |
| 9 | Nobilis in genere egregio, generosior actu; |
| 10 | Obsequio locuples, melius virtutibus auctus; |
| 11 | Tractabat laicus quod clericus efficiebat. |
| 12 | Cuius honorandum nomen sermone Latino, |
| 13 | Pulcher natus adest: meritoque probabilis illo |
| 14 | Nomine dignus erat, Patrem qui cunctipotentem |
| 15 | Elegit, pulchroque Deum quaesivit amore. |