Walafrid Strabo, Vita Sancti Blaitmaici, I. PROLOGUS.
| 1 | Si tantam meruere suo pro carmine famam, |
| 2 | Qui scelerosorum mores et facta tulerunt |
| 3 | Laudibus in coelum, perfusi daemonis arte, |
| 4 | Frivola nectentes hominum monimenta malorum: |
| 5 | Cur non liberius sanctorum facta canamus, |
| 6 | Quos placuisse Deo nobis miracula produnt? |
| 7 | Quae fidei virtute gerunt per munera Christi. |
| 8 | Nam Scriptura canit, Domino spondente pusillis: |
| 9 | Os aperire tuum studeas, ego verba ministro [Psal. 80]. |
| 10 | Quapropter, venerande Pater, charissime Felix, |
| 11 | Praeceptis parere tuis ex corde paratus |
| 12 | Strabus ego, misit quem terra Alamannica natu, |
| 13 | Scribere disposui de vita et fine beati |
| 14 | Blaitmaici, genuit quem dives Hibernia mundo, |
| 15 | Martyriique sequens misit perfectio coelo, |
| 16 | Ipsius ut meritis veniam per saecla capessam. |