Walafrid Strabo, Hortulus, X GLADIOLA.
1 | Te neque transierim Latiae cui libera linguae |
2 | Nomine digladii nomen facundia finxit. |
3 | Tu mihi purpurei progignis floris honorem, |
4 | Prima aestate gerens violae iucunda nigellae |
5 | Munera, vel qualis mensa sub Apollinis alta |
6 | Investis pueri pro morte recens Hyacinthus |
7 | Exiit, et regis signavit vertice nomen. |
8 | Radicis ramenta tuae siccata fluenti |
9 | Diluimus contusa mero, saevumque dolorem |
10 | Vesicae premimus tali, non secius, arte. |
11 | Pignore, fullo, tuo, lini candentia texta |
12 | Efficit ut rigeant , dulcesque imitentur odores. |