Livius, Periochae, 125

monumenta.ch > Livius > 125
Livius, Periochae, CXXIV <<< >>> CXXVI

Livius, Periochae, CXXV

1 Caesar relicto trans mare Antonio (provinciae ea parte imperi positae ei cesserant) reversus in Italiam veteranis agros divisit. Seditiones exercitus sui quas corrupti a Fulvia, M. Antoni uxore, milites adversus imperatorem suum concitaverant, cum gravi periculo inhibuit. L. Antonius cos., M. Antoni frater, eadem Fulvia consiliante bellum Caesari intulit. Receptis in partes suas populis quorum agri veteranis adsignati erant, et M. Lepido, qui custodiae urbis cum exercitu praeerat, fuso hostiliter in urbem inrupit.