Livius, Periochae, 107

monumenta.ch > Livius > 107
Livius, Periochae, CVI <<< >>> CVIII

Livius, Periochae, CVII

1 C. Caesar Treveris in Gallia victis iterum in Germaniam transiit, nulloque ibi hoste invento reversus in Galliam Eburonas et alias civitates, quae conspiraverant, vicit et Ambiorigem in fuga persecutus est.
2 P. Clodi a T. Annio Milone candidato consulatus Appia via ad Bovillas occisi corpus plebs in curia cremavit.
3 Cum seditiones inter candidatos consulatus, Hypsaeum, Scipionem, Milonem essent, qui armis ac vi contendebant, ad comprimendas eas Cn. Pompeius delegatus et a senatu cos. tertio factus est absens et solus, quod nulli alii umquam accidit.
4 Quaestione decreta de morte P. Clodi Milo iudicio damnatus in exilium actus est.
5 Lex lata est ut ratio absentis Caesaris in petitione consulatus haberetur, invito et contradicente M. Catone.
6 Praeterea res gestas a C. Caesare adversus Gallos qui prope universi Vercingentorige Arverno duce defecerunt, et laboriosas obsidiones urbium continet, inter quas Avarici Biturigum et Gergoviae Arvernorum.