monumenta.ch > Livius > 86
Livius, Periochae, LXXXV <<<     >>> LXXXVII

Livius, Periochae, LXXXVI


1 Cum C. Marius, C. Mari filius, cos. ante annos XX per vim creatus esset, C. Fabius in Africa propter crudelitatem et avaritiam suam in praetorio suo vivus exustus est.
2 L. Philippus, legatus Syllae, Sardiniam Q. Antonio praetore pulso et occiso occupavit.
3 Sylla cum Italicis populis, ne timeretur ab his velut erepturus civitatem et suffragii ius nuper datum, foedus percussit. Itemque ex fiducia iam certae victoriae litigatores a quibus adibatur vadimonia Romam deferre iussit, cum a parte diversa urbs adhuc teneretur.
4 L. Damasippus praetor ex voluntate C. Mari cos. cum senatum contraxisset, omnem quae in urbe erat nobilitatem trucidavit. Ex cuius numero Q. Mucius Scaevola pont. max. fugiens in vestibulo aedis Vestae occisus est.
5 Praeterea bellum a L. Murena adversus Mithridatem in Asia renovatum continet. Livius HOME
bnf1767.57 bsb115093.115 cpl894.199