Livius, Periochae, 085

monumenta.ch > Livius > 85
Livius, Periochae, LXXXIV <<< >>> LXXXVI

Livius, Periochae, LXXXV

1 Sulla in Italiam traiecit missisque legatis, qui de pace agerent, et ab cos. C. Norbano violatis eumdem Norbanum proelio vicit. Et cum L. Scipionis, alterius cos., cum quo per omnia id egerat ut pacem iungeret nec potuerat, castra oppugnaturus esset, universus exercitus consulis, sollicitatus per emissos a Sylla milites, signa ad Syllam transtulit. Scipio cum occidi posset, dimissus est.
2 Cn. Pompeius, Cn. Pompei eius qui Asculum ceperat filius, conscripto voluntariorum exercitum cum tribus legionibus ad Syllam venerat, ad quem se nobilitas omnis conferebat, ita ut deserta urbe ad castra veniretur.
3 Praeterea expeditiones per totam Italiam utriusque partis ducum referuntur.