monumenta.ch > Ovidius > bavPal.lat.1663.225 > 73
Livius, Periochae, LXXII <<<     >>> LXXIV

Livius, Periochae, LXXIII


1 L. Iulius Caesar cos. male adversus Samnites pugnavit. Nola colonia in potestatem Samnitium venit cum L. Postumio praetore qui ab his interfectus est.
2 Complures populi ad hostes defecerunt. Cum P. Rutilius cos. parum prospere adversus Marsos pugnasset et in eo proelio cecidisset, C. Marius, legatus eius, meliore eventu cum hostibus acie conflixit.
3 Servius Sulpicius Paelignos proelio fudit.
4 Q. Caepio, legatus Rutili, cum obsessus prospere in hostes inrupisset, et ob eum successum aequatum ei cum C. Mario esset imperium, temerarius factus et circumventus insidiis fuso exercitu cecidit.
5 L. Iulius Caesar cos. feliciter adversus Samnites pugnavit. Ob eam victoriam Romae saga posita sunt.
6 Et ut varia belli fortuna esset, Aeserna colonia cum M. Marcello in potestatem Samnitium venit, sed et C. Marius proelio Marsos fudit, Hierio Asinio, praetore Marrucinorum, occiso. Livius HOME
bnf1767.57 bsb115093.115 cpl894.193