Livius, Periochae, 016

monumenta.ch > Livius > 55 > 16
Livius, Periochae, XV <<< >>> XVI

Livius, Periochae, XVI

1 Origo Carthaginiensium et primordia urbis eorum referuntur. Contra quos et Hieronem, regem Syracusanorum, auxilium Mamertinis ferendum senatus censuit, cum de ea re inter suadentes ut id fieret, dissuadentesque contentio fuisset; transgressisque tunc primum mare exercitibus Romanis adversus Hieronem saepius bene pugnatum. Petenti pax data est.
2 Lustrum a censoribus conditum est. Censa sunt civium capita CCCLXXXII milia CCXXXIIII.
3 Decimus Iunius Brutus munus gladiatorium in honorem defuncti patris primus edidit.
4 Colonia Aesernia deducta est.
5 Res praeterea contra Poenos et Vulsinios prospere gestas continet.