Livius, Periochae, 010

monumenta.ch > Livius > 10
Livius, Periochae, IX <<< >>> XI

Livius, Periochae, X

1 Coloniae deductae sunt Sora et Alba et Carsioli. Marsi in deditionem accepti sunt.
2 Collegium augurum ampliatum est, ut essent novem, cum antea quaterni fuissent.
3 Lex de provocatione ad populum a Murena cos. tertio tunc lata est. Duae tribus adiectae sunt, Aniensis et Terentina.
4 Samnitibus bellum indictum est et adversus eos saepe prospere pugnatum est.
5 Cum adversus Etruscos, Umbros, Samnites, Gallos, P. Decio et Q. Fabio ducibus pugnaretur et Romanus exercitus in magno discrimine esset, P. Decius, secutus patris exemplum, devovit se pro exercitu et morte sua victoriam eius pugnae populo R. dedit.
6 Papirius Cursor Samnitium exercitum, qui de iureiurando obstrictus quo maiore constantia virtutis pugnaret, in aciem descenderat, fudit.
7 Census actus est, lustrum conditum. Censa sunt civium capita CCLXXII milia et CCCXX.