Hieronymus, Vita S. Hilarionis, 3, 18.
| 1 | Orion vir primarius. |
| 2 | - Sed nec illud tacendum est, quod Orion [Al. Orionus] vir primarius et ditissimus urbis Ailae, quae mari Rubro imminet, a legione possessus daemonum, ad eum adductus est. |
| 3 | Manus, cervix, latera, pedes ferro onerati erant, furorisque saevitiam torvi oculi minabantur. |
| 4 | Cumque deambularet sanctus cum fratribus, et de Scripturis nescio quid interpretaretur, erupit ille de manibus se tenentium: et amplexus [Al. amplexans et amplexatus] eum post tergum, in sublime levavit. |
| 5 | Clamor ortus ab omnibus: timebant enim ne confecta ieiuniis membra collideret. |
| 6 | Sanctus arridens: Silete [Al. sinite], inquit, et mihi meum palaestritam dimittite. |
| 7 | Ac sic reflexa super humeros manu, caput eius tetigit: apprehensoque crine, ante pedes adduxit: stringens e regione ambas manus eius, et plantas utroque calcans pede, simulque ingeminans, torquere [Al. torquere, ait], daemonum turba, torquere. |
| 8 | Cumque ille eiularet, et reflexa cervice terram vertice tangeret: Domine, inquit, Iesu, solve miserum, solve captivum. |
| 9 | Ut unum, ita et plures vincere tuum est. |
| 10 | Rem loquor inauditam, ex uno hominis ore diversae voces, et quasi confusus populi clamor audiebatur. |
| 11 | Curatus itaque et hic, non post multum temporis cum uxore et liberis venit ad monasterium, plurima, quasi gratiam redditurus, dona afferens. |
| 12 | Cui sanctus: Non legisti, inquit, quid Giezi (IV Reg. V), quid Simon (Act. VIII) passi sint: quorum alter accepit pretium, alter obtulit: ut ille venderet gratiam Spiritus sancti, hic mercaretur? |
| 13 | Cumque Orion flens diceret: Accipe, et da pauperibus; respondit: Tu melius potes tua distribuere, qui per urbes ambulas, et nosti pauperes. |
| 14 | EGO QUI MEA reliqui, cur aliena appetam? |
| 15 | Multis nomen pauperum, occasio avaritiae est: misericordia vero artem non habet. |
| 16 | NEMO MELIUS erogat, quam qui sibi nihil reservat. |
| 17 | Tristi autem et in terra iacenti: Noli, inquit, contristari fili; quod facio pro me, et pro te facio. |
| 18 | Si enim haec accepero, et ego offendam Deum et ad te legio revertetur. |