Hieronymus, Psalmorum 2, LIBER PSALMORUM IUXTA SEPTUAGINTA INTERPRETES..., PSALMUS CVII.
| 1 | CANTICUM PSALMI DAVID. Paratum cor meum, Deus, <paratum cor meum> cantabo et psallam in gloria mea. |
| 2 | Exsurge psalterium et cithara, exsurgam diluculo. |
| 3 | Confitebor tibi in populis, Domine, et psallam tibi in nationibus. |
| 4 | Quia magna est super coelos misericordia tua: et usque ad nubes veritas tua. |
| 5 | Exaltare super coelos, Deus, et super omnem terram gloria tua: ut liberentur dilecti tui. |
| 6 | Salvum fac dextera tua, et exaudi me: Deus locutus est in sancto suo. |
| 7 | Exsultabo, <et> dividam Sichimam: et convallem tabernaculorum dimetiar. |
| 8 | Meus est Galaad, et meus est Manasses, et Ephraim susceptio capitis mei. |
| 9 | Iuda rex meus: Moab lebes spei meae. |
| 10 | In Idumaeam extendam calceamentum meum: mihi alienigenae amici facti sunt. |
| 11 | Quis deducet me in civitatem munitam? quis deducet me usque in Idumaeam? Nonne tu, Deus, qui repulisti nos? et non exibis, Deus, in virtutibus nostris? Da nobis auxilium de tribulatione: quia vana salus hominis. |
| 12 | In Deo faciemus virtutem: et ipse ad nihilum deducet inimicos nostros. |
| 13 | CANTICUM PSALMI DAVID. Paratum cor meum, Deus, paratum cor meum: cantabo et psalmum dicam Domino. |
| 14 | Exsurge psalterium et cithara: exsurgam diluculo. |
| 15 | Confitebor tibi in populis, Domine: et psalmum dicam tibi inter gentes. |
| 16 | Quoniam magnificata est usque ad coelos misericordia tua: et usque ad nubes veritas tua. |
| 17 | Exaltare super coelos, Deus, et super omnem terram gloria tua: ut liberentur electi tui. |
| 18 | Salvum me [Ms. tac. me] fac dextera tua, et exaudi me, Deus locutus est in sancto suo: laetabor, et dividam Sicimam, et convallem tabernaculorum metibor [Ms. dimetiar]. |
| 19 | Meus est Galaad, et meus est Manasses: et Ephrem fortitudo capitis mei. |
| 20 | Iuda [Ms. Iudas] rex meus, Moab olla spei meae: in Idumaeam extendam calciamentum meum, mihi allophyli subditi sunt. |
| 21 | Quis deducet me in civitatem munitam? aut quis deducet me usque in Idumaeam? Nonne tu, Deus, qui repulisti nos? et non egredieris, Deus, in virtutibus nostris. |
| 22 | Da nobis auxilium de tribulatione: et vana salus hominum. |
| 23 | In Deo faciemus virtutem: et ipse ad nihilum deducet tribulantes nos. |