monumenta.ch > Hieronymus > 44
Hieronymus, Epistulae, 2, 43. AD MARCELLAM. <<<     >>> 45. AD ASELLAM.

Hieronymus, Epistulae, 2, 44[Alias 20. Scripta circa idem tempus quae superior.]. AD MARCELLAM. [De Muneribus.]

1 [Munuscula missa a Marcella, sibi, et Paulae, filiaeque huius Eustochio, per iocum allegorice interpretatur.]
Ut absentiam corporum, Spiritus confabulatione solemur: [Hieronymi quidem ingenio ac manu, sed alterius nomine, et fortasse Paulae, et Eustochii scripta videtur isthaec Epistola ex toto contextu, sed iis maxime verbis, quibus ex velatarum Virginum nomine suum munus esse constituit, mysteria in munusculis invenire. Veronensis maior, faciat.] facit unusquisque quod praevalet. Vos dona transmittitis: nos Epistulas remittimus gratiarum. Ita tamen ut, quia velatarum virginum munus est, aliqua in ipsis munusculis esse mysteria demonstremus. Saccus, orationis signum atque ieiunii est. Sellae, ut foras pedes virgo non moveat. Cerei, ut accenso lumine, sponsi exspectetur adventus. Calices mortificationem carnis ostendunt, et semper animum ad martyrium praeparatum. 'Calix quippe Domini inebrians, quam praeclarus est'[Ps. 22. 5]. Quod autem et matronis [Idem Veronen. «offerimus paria parvis animalibus ventilanda» (fort. ventalibra) unde quidem coniicias impressam pariter, et Mss. lectionem aliquot mendis non carere; non autem quo pacto sit restituenda, satis intelligimus. Vid. notas Chronologicas.] offertis muscaria parva, parvis animalibus eventilandis, elegans significatio est, debere luxuriam cito restinguere; quia muscae moriturae, oleum sua vitatis exterminant. Hic typus sit virginum: haec figura matronarum. Nobis autem, licet in perversum, munera vestra conveniunt: Sedere aptum est otiosis, in sacco iacere poenitentibus, calices habere potantibus. Licet et propter nocturnos metus, et animos semper malo conscientiae formidantes, cereos quoque accendisse sit gratum.Hieronymus HOME
bnf11864.91 bsb4610.256