Hieronymus, Dialogus contra Pelagianos, LIBER SECUNDUS., 9.
| 1 | Iterum ex Apostolo. |
| 2 | - Vas electionis humilitate deiectus, immo conscientia fragilitatis suae loquitur: Ego sum minimus Apostolorum, qui non sum dignus vocari Apostolus, quoniam persecutus sum Ecclesiam Dei: gratia autem Dei sum id quod sum, et gratia ipsius in me vacua non fuit; sed omnibus illis amplius laboravi, non ego autem, sed gratia Deus quae mecum est (I Cor. I, 9, 10). |
| 3 | Dicit se plus omnibus Apostolis laborasse, statimque laborem suum ad Dei refert auxilium: Non ego, inquiens, sed gratia Dei, quae mecum est (II Cor. III, 4); sicut et in alio loco loquitur: Fiduciam autem talem habemus per Iesum Christum ad Deum, non quia ex nobis ipsis sufficientes simus reputare aliquid, quasi ex nostro: sed sufficientia nostra ex Deo est, qui et nos dignos fecit ministros novi Testamenti (II Cor. III, 4-6). |
| 4 | Non enim iustificatur homo ex operibus legis, nisi per fidem Iesu Christi. |
| 5 | Unde infert: Et nos in Iesum Christum credidimus, ut iustificemur ex fide Christi, et non ex operibus legis, quia ex operibus legis non iustificabitur omnis caro (Gal. II, 16). |
| 6 | Si enim ex lege iustitia, ergo Christus sine causa mortuus est (Ibid., 21). |
| 7 | In lege maledictio est; scriptum est enim, Maledictus omnis, qui non permanet in omnibus quae scripta sunt in libro Legis, ut faciat ea. |
| 8 | Christus nos redemit de maledictione legis, factus pro nobis maledictio (Gal. III, 10, 13). |
| 9 | Si enim data esset lex, quae posset vivificare, vere ex lege esset iustitia. |
| 10 | Sed conclusit Scriptura omnia sub peccato, ut repromissio per fidem Iesu Christi daretur credentibus. |
| 11 | Lex ergo paedagogus noster fuit in Christo, ut ex fide iustificemur (Ibid., 21-24). |
| 12 | Unde addit, et uno versiculo omnia comprehendit, dicens: Evacuati estis a Christo, qui in lege iustificamini, a gratia excidistis (Galat. V, 4). |