Hieronymus, Dialogus contra Pelagianos, LIBER PRIMUS., 37.
| 1 | Ex Iosuae libro. |
| 2 | - De Iesu filio Nave duo tantum ponam testimonia. |
| 3 | Peccavit Achan, et totus populus offendit. |
| 4 | Dixitque Dominus ad Iosue: Non poterunt stare filii Israel in conspectu inimicorum suorum; sed dorsa vertent adversariis suis, quia factum est anathema in eis. |
| 5 | Et non addam ut sim vobiscum, nisi contritum fuerit anathema de medio vestrum (Ios. VII, 12). |
| 6 | Cumque sacrilegium quaereretur, et sors latentem invenisset reum, interficiuntur cum Achan filii eius, et filiae, boves, asini, pecora; tabernaculum, et quaecumque habere potuit, igne deleta sunt. |
| 7 | Esto, ipse peccaverit: quid commisere filii? quid boves? quid asini? quid pecora? Fac Deo calumniam quare unus peccaverit, et pars populi trucidata sit? Cur et ipse lapidatur [Al. lapidetur], et omnia quae habere potuerit, ultrix flamma consumpserit? Dicamus et aliud: Non erat, inquit, civitas, quam non tradidit Dominus filiis Israel, absque Eveo qui habitabat in Gabaon: omnes pugnando ceperunt, quia a Domino factum erat, ut induraret cor eorum, et pugnarent contra Israel, ut interficerentur: et non fieret in eis misericordia, et perirent, sicut praecepit Dominus Moysi (Ios. XI, 11, 12). |
| 8 | Si Domini factum est voluntate, ut pacem non reciperent, nec susciperent Israel; dicamus iuxta Apostolum: Quid ergo queritur? Voluntati enim eius quis potest resistere (Rom. IX, 19)? |