Hieronymus, Chronicon S. Hieronymi, Romanorum.
| 1 | ( An. Dom. 353) 13 Magnentio apud Augustodunum arripiente imperium, Constans haud longe ab Hispania in castro, cui Helenae nomen est, interficitur, anno aetatis 30, imperii vero sui 13: quamobrem turbata republica, VETRANIO Mursae, NEPOTIANUS Romae imperatores facti. |
| 2 | Victorinus natione Afer Romae rhetoricam docet. |
| 3 | Romae populus adversum Magnentianos rebellans, ab Heraclida Senatore proditur. |
| 4 | Nepotiani caput pilo per urbem circumlatum, multaeque proscriptiones nobilium et caedes factae. |
| 5 | ( An. Dom. 354) 14 Vetranioni apud Naissum a Constantio regium insigne detractum. |
| 6 | Magnentius Mursae victus, in quo praelio Romanae vires conciderunt. |
| 7 | Gallus Constantii patruelis Caesar factus. |
| 8 | ( Olymp. 283) (An. Dom. 355) 15 Gallus Iudaeos, qui, interfectis per noctem militibus, arma ad rebellandum invaserant, oppressit, caesis multis hominum millibus usque ad innoxiam aetatem, et civitates eorum Diocaesaream, Tiberiadem, et Diospolim, plurimaque oppida igni tradidit. |
| 9 | Nonnulli nobilium Antiochiae a Gallo interfecti. |
| 10 | Syriae populis crucis signum, et maximo conspicientium terrore, in orientali plaga apparuit. |
| 11 | ( An. Dom. 356) ( Ann. ab Abr. 2370) 16 Magnentius Lugduni in Palatio propria se manu interfecit, et DECENTIUS frater eius, quem ad tuendas Gallias Caesarem miserat, apud Senonas laqueo vitam explet. |
| 12 | ( An. Dom. 357 ) 17 Gennadius forensis orator, Romae insignis habetur. |