Gregorius Magnus, Regula pastoralis, TERTIA PARS. QUALITER RECTOR BENE..., CAPUT XXVII. [ Al. LI] Quomodo admonendi coniugati et caelibes.
| 1 | ( Admonitio 28.) Aliter admonendi sunt coniugiis obligati, atque aliter a coniugii nexibus liberi. |
| 2 | Admonendi namque sunt coniugiis obligati, ut cum vicissim quae sunt alterius cogitant, sic eorum quisque placere studeat coniugi, ut non displiceat Conditori; sic ea quae huius mundi sunt agant, ut tamen appetere quae Dei sunt non omittant; sic de bonis praesentibus gaudeant, ut tamen sollicita intentione mala aeterna pertimescant; sic de malis temporalibus lugeant, ut tamen consolatione integra spem in bonis perennibus figant; quatenus dum in transitu cognoscunt esse quod agunt, in mansione quod appetunt; nec mala mundi cor frangant, cum spes bonorum coelestium roborat; nec bona praesentis vitae decipiant, cum suspecta subsequentis iudicii mala contristant. |
| 3 | Itaque animus Christianorum coniugum et infirmus et fidelis, qui et plene cuncta temporalia despicere non valet, et tamen aeternis se coniungere per desiderium valet; quamvis in delectatione carnis interim iaceat, supernae spei refectione convalescat. |
| 4 | Et si habet quae mundi sunt in usu itineris, sperat quae Dei sunt in fructu perventionis; nec totum se ad hoc quod agit conferat, ne ab eo quod robuste sperare debuit funditus cadat. |
| 5 | Quod bene ac breviter Paulus exprimit, dicens: Qui habent uxores, tanquam non habentes sint; et qui flent, tanquam non flentes; et qui gaudent, tanquam non gaudentes (I Cor. VII, 29, 30). |
| 6 | Uxorem quippe quasi non habendo habet, qui sic per illam carnali consolatione utitur, ut tamen nunquam ad prava opera a melioris intentionis rectitudine eius amore flectatur. |
| 7 | Uxorem quasi non habendo habet, qui transitoria esse cuncta conspiciens, curam carnis ex necessitate tolerat, sed aeterna gaudia spiritus ex desiderio exspectat. |
| 8 | Non flendo autem flere, est sic exteriora adversa plangere, ut tamen noverit aeternae spei consolatione gaudere. |
| 9 | Et rursum, non gaudendo gaudere, est sic de infimis animum attollere, ut tamen nunquam desinat summa formidare. |
| 10 | Ubi apte quoque paulo post subdit: Praeterit enim figura huius mundi (Ibid., 1). |
| 11 | Ac si aperte diceret: Nolite constanter mundum diligere, quando et ipse non potest, quem diligitis, stare. |
| 12 | Incassum cor quasi manentes figitis, dum fugit ipse quem amatis. |
| 13 | Admonendi sunt coniuges, ut ea in quibus sibi aliquando displicent, et patientes invicem tolerent, et exhortantes invicem salvent. |
| 14 | Scriptum namque est: Invicem onera vestra portate, et sic adimplebitis legem Christi (Galat. IV, 2). |
| 15 | Lex quippe Christi charitas est; quia ex illo nobis et largiter sua bona contulit, et aequanimiter mala nostra portavit. |
| 16 | Tunc ergo legem Christi imitando complemus, quando et nostra bona benigne conferimus, et nostrorum mala pie sustinemus. |
| 17 | Admonendi quoque sunt, ut eorum quisque non tam quae ab altero tolerat, quam quae ab ipso tolerantur attendat. |
| 18 | Si enim sua quae portantur considerat, ea quae ab altero sustinet, levius portat. |
| 19 | Admonendi sunt coniuges, ut suscipiendae prolis se meminerint causa coniunctos, et cum immoderatae admistioni servientes, propagationis articulum in usum transferunt voluptatis, perpendant quod licet extra non exeant, in ipso tamen coniugio coniugii iura transcendunt. |
| 20 | Unde necesse est ut crebris exorationibus deleant quod pulchram copulae speciem admistis voluptatibus foedant. |
| 21 | Hinc est enim quod peritus medicinae coelestis Apostolus non tam sanos instituit, quam infirmis medicamenta monstravit, dicens: De quibus scripsistis mihi: Bonum est homini mulierem non tangere; propter fornicationem autem unusquisque suam habeat uxorem, et unaquaeque suum virum habeat (I Cor. VII, 1, seq. etc.). |
| 22 | Qui enim fornicationis metum praemisit, profecto non stantibus praeceptum contulit; sed ne fortasse in terram ruerent, lectum cadentibus ostendit. |
| 23 | Unde adhuc infirmantibus subdidit: Uxori vir debitum reddat, similiter et uxor viro (Ibid.). |
| 24 | Quibus dum in magna honestate coniugii aliquid de voluptate largiretur, adiunxit: Hoc autem dico secundum indulgentiam, non secundum imperium (Ibid.). |
| 25 | Culpa quippe esse innuitur, quod indulgeri perhibetur; sed quae tanto citius relaxetur, quanto non per hanc illicitum quid agitur, sed hoc quod est licitum, sub moderamine non tenetur. |
| 26 | Quod bene Loth in semetipso exprimit, qui ardentem Sodomam fugit; sed tamen Segor inveniens, nequaquam mox montana conscendit (Gen. XIX, 30). |
| 27 | Ardentem quippe Sodomam fugere, est illicita carnis incendia declinare. |
| 28 | Altitudo vero montium, est munditia continentium. |
| 29 | Vel certe quasi in monte sunt qui etiam carnali copulae inhaerent, sed tamen extra suscipiendae prolis admistionem debitam, nulla carnis voluptate solvuntur. |
| 30 | In monte quippe stare est, nisi fructum propaginis in carne non quaerere. |
| 31 | In monte stare, est carni carnaliter non adhaerere. |
| 32 | Sed quia multi sunt qui scelera quidem carnis deserunt, nec tamen in coniugio positi usus solummedo debiti iura conservant, exiit quidem Loth Sodomam, sed tamen mox ad montana non pervenit, quia iam damnabilis vita relinquitur, sed adhuc celsitudo coniugalis continentiae subtiliter non tenetur. |
| 33 | Est vero in medio Segor civitas, quae fugientem salvet infirmum, quia videlicet cum sibi per incontinentiam miscentur coniuges, et lapsus scelerum fugiunt, et tamen venia salvantur. |
| 34 | Quasi parvam quippe civitatem inveniunt in qua ab ignibus defendantur, quia coniugalis haec vita non quidem in virtutibus mira est, sed tamen a suppliciis secura. |
| 35 | Unde idem Loth ad angelum dicit: Est civitas hic iuxta, ad quam possum fugere, parva; et salvabor in ea. |
| 36 | Nunquid non modica est, et vivet anima mea in ea (Genes. XIX, 20)? Iuxta ergo dicitur, et tamen ad salutem tuta perhibetur, quia coniugalis vita nec a mundo longe divisa est, nec tamen a gaudio salutis aliena. |
| 37 | Sed tunc in hac actione vitam suam coniuges quasi in parva civitate custodiunt, quando pro se assiduis deprecationibus intercedunt. |
| 38 | Unde et recte per angelum ad eumdem Loth dicitur: Ecce etiam in hoc suscepi preces tuas, ut non subvertam urbem pro qua locutus es (Ibid. 21). |
| 39 | Qui videlicet cum deprecatio funditur Deo nequaquam talis coniugii vita damnatur. |
| 40 | De qua deprecatione Paulus quoque admonet, dicens: Nolite fraudare invicem, nisi forte ex consensu ad tempus, ut vacetis orationi (I Cor. VII, 5). |
| 41 | At contra admonendi sunt qui ligati coniugiis non sunt, ut praeceptis coelestibus eo rectius serviant, quo eos ad curas mundi nequaquam iugum copulae carnalis inclinat; ut quos onus licitum coniugii non gravat, nequaquam pondus illicitum terrenae sollicitudinis premat; sed tanto eos paratiores dies ultimus, quanto et expeditiores inveniat; ne quo meliora agere vacantes possunt, sed tamen negligunt, eo supplicia deteriora mereantur. |
| 42 | Audiant quod Apostolus cum quosdam ad caelibatus gratiam instrueret, non coniugium sprevit, sed curas mundi nascentes ex coniugio repulit, dicens: Hoc ad utilitatem vestram dico, non ut laqueum vobis iniiciam; sed ad id quod honestum est, et quod facultatem praebeat sine impedimento Domino observiendi (Ibid., 35). |
| 43 | Ex coniugiis quippe terrenae sollicitudines prodeunt; et idcirco magister gentium auditores suos ad meliora persuasit, ne sollicitudine terrena ligarentur. |
| 44 | Quem igitur caelibem curarum saecularium impedimentum praepedit, et coniugio se nequaquam subdidit, et tamen coniugii onera non evasit. |
| 45 | Admonendi sunt caelibes, ne sine damnationis iudicio misceri se feminis vacantibus putent. |
| 46 | Cum enim Paulus fornicationis vitium tot criminibus exsecrandis inseruit, cuius sit reatus indicavit, dicens: Neque fornicatores, neque idolis servientes, neque adulteri, neque molles, neque masculorum concubitores, neque fures, neque avari, neque ebriosi, neque maledici, neque rapaces regnum Dei possidebunt (I Cor. VI, 9, 10). |
| 47 | Et rursum: Fornicatores autem et adulteros iudicabit Deus (Hebr. XIII, 4). |
| 48 | Admonendi itaque sunt, ut si tentationum procellas cum difficultate salutis tolerant, coniugii portum petant. |
| 49 | Scriptum namque est: Melius est nubere, quam uri (I Cor. VII, 9). |
| 50 | Sine culpa scilicet ad coniugium veniunt, si tamen necdum meliora voverunt. |
| 51 | Nam quisquis bonum maius subire proposuit, bonum minus quod licuit, illicitum fecit. |
| 52 | Scriptum quippe est: Nemo mittens manum suam ad aratrum, et respiciens retro, aptus est regno caelorum (Luc. IX, 62). |
| 53 | Qui igitur fortiori studio intenderat, retro convincitur respicere, si relictis amplioribus bonis ad minima retorquetur. |