| 1 | Tantum debet actionem populi actio transcendere praesulis, quantum distare solet a grege vita pastoris. |
| 2 | Oportet namque ut metiri sollicite studeat quanta tenendae rectitudinis necessitate constringitur, sub cuius aestimatione populus grex vocatur. |
| 3 | Sit ergo necesse est cogitatione mundus, actione praecipuus, discretus in silentio, utilis in verbo, singulis compassione proximus, prae cunctis contemplatione suspensus, bene agentibus per humilitatem socius, contra delinquentium vitia per zelum iustitiae erectus, internorum curam in exteriorum occupatione non minuens, exteriorum providentiam in internorum sollicutidine non relinquens. |
| 4 | Sed haec quae breviter enumerando perstrinximus, paulo latius replicando disseramus. |