Gregorius Magnus, Epistolae, 13, EPISTOLA IV. AD IANUARIUM CARALITANUM EPISCOPUM. Desideriae abbatissae et Ioannis abbatis contentionem, adhibitis episcopis duobus, finiat.
| 1 | Gregorius Ianuario episcopo Caralis. |
| 2 | Quando inter religiosas personas de terrenis rebus controversia nascitur, ita sacerdotali est sollicitudine finienda, ut crescere non possit ex mora contentio. |
| 3 | Desideria siquidem abbatissa, latrix praesentium, huc veniens questa est substantiam parentum suorum, pariter et germani sui sibi rationabiliter competentem, a Ioanne abbate indebite detineri. |
| 4 | Et quia eamdem causam interveniente petit iudicio terminari, fraternitas vestra, adhibitis sibi Innocentio atque Libertino fratribus et coepiscopis nostris, cum eis negotii huius qualitatem diligenter examinet, et pari consilio communique tractatu ita se in definiendo ex omni latere festinet exhibere sollicitam, quatenus et ipsa omni invidia favoris ac negligentiae careat, et inter illos post definitionem vestram aliquod non possit litigium remanare. |
| 5 | Si vero aliqua ex lege vobis ad proferendam sententiam fuerit nata dubietas, sapientem virum, et quem nostis Dei timorem habere prae oculis, requirite, ut, ab eo quid sit legitimum informati, nullam reprehensionem vestrae definitionis valeat calculus sustinere. |
| 6 | Mense Novembri, indict. 6. |