Gregorius Magnus, Epistolae, 11, EPISTOLA XLII. AD IOANNEM SYRACUSANUM EPISCOPUM. De possessionum Fausti finibus iniuste pervasis.
| 1 | Gregorius Ioanni episcopo Syracusano. |
| 2 | Gloriosissimus filius noster Faustus directa petitione nos adiit, asserens fines possessionis suae illic intra Siciliam positos a vestris nuper hominibus occupatos, atque ob hoc rem violenter ablatam sibi per praeceptionis nostrae seriem debere petiit reformari. |
| 3 | Quod quia, si ita ut asserit factum est, a fraternitatis vestrae cognitione omnino credimus alienum, diligenter inquirite. |
| 4 | Et si, ut asserit, contra iuris ordinem fines ipsius a possidente sublati sunt, in possessoris redeat res pervasa dominium. |
| 5 | Et tunc si quid est quod a vestra Ecclesia proprietatis iure utiliter opponatur, electorum debet iudicium provenire, eorumque iudicio terminari, dummodo indecenter possessoris ius minime perturbetur. |
| 6 | Sed causa iudiciali termino definita, sine sacerdotali invidia dominum atque iustitiam res manifesta cognoscat. |