Gregorius Magnus, Epistolae, 11, EPISTOLA XVII. AD ANTHEMIUM SUBDIACONUM. Theodoram viduam commendat, ne, ob ingratum filii animum, cui nubenti sua donaverat omnia, inopiam patiatur.
| 1 | Gregorius Anthemio subdiacono Campaniae. |
| 2 | Theodora relicta Sabini defensoris, misso huc homine suo, questa est nobis a filio suo et Aligerno quodam, cuius filiam idem filius eius in coniugio suo sortitus est, deceptam esse, ut omnes res suas tempore nuptiarum eidem filio donationis titulo legaret, et nunc se ab eis valde despici atque contemni; adeo ut, ablatis rebus ipsius, nihil ei unde possit nutriri remanserit. |
| 3 | A quibus insuper etiam tantam se adversitatem asserit sustinere, ut nec servum iuris sui ei deservire, nec in aliquo solatiari permittant. |
| 4 | Et quia, si ita se res habet, grave nimis et contra Deum est, huius tibi auctoritatis tenore praecipimus ut veritatem cures addiscere. |
| 5 | Et si ita repereris, ecclesiasticam tuitionem impendere, atque eam salva in omnibus ratione adiuvare festines, quatenus te illic posito nullum denuo gravamen vel oppressionem a praedictis viris quolibet modo sustineat. |
| 6 | Sed providere studii tui sit ut in id quod se deceptam queritur legaliter valeat subveniri, quia omnino crudele est ut mulier quae ex filii persona debet sperare solatium, per eum magis necessitati cogatur vel inopiae subiacere. |
| 7 | Quod si forte quies vel sola ium ipsius te procurante non potuerit ordinari, nobis renuntiare festina, ut quid post haec facere debeas, nostra iterum praeceptione cognoscas. |