Gregorius Magnus, Epistolae, 9, EPISTOLA LXXXIII. AD FANTINUM DEFENSOREM PANORMITANUM. Ianuariam ab Anastasii et Bonifacii molestiis tueatur.
| 1 | Gregorius Fantino defensori Panormitano. |
| 2 | Ianuaria praesentium latrix maximam se molestiam ab ingenuo Anastasio atque Bonifacio contra iustitiam pati commemorat, adeo ut possessione quam per plurimos annos asseritur possedisse eam, sicut ipsa ait, nitantur expellere. |
| 3 | Et quia contra eos se ecclesiastica debere petiit tuitione defendi, experientia tua praedictos viros ad se evocet, eosque admoneat ut illi mali facere nihil praesumant. |
| 4 | Sed si quid sibi contra suprascriptam mulierem credunt iuste posse competere, iudices cum ea eligant, et quae inter eos fuerint definita, tuo pro quiete partium solatio compleantur. |
| 5 | Si vero eos differe cognoveris, antefatae mulieri, salva aequitate, tuitionem impendas, et eam contra rationis ordinem nullo modo gravari permittas. |