Gregorius Magnus, Epistolae, 9, EPISTOLA XXIII. AD IOANNEM SYRACUSANUM EPISCOPUM. Commissas Romano defensori causas Leontii adversus Leonem episcopum, et Archelaum medicum.
| 1 | Gregorius Ioanni episcopo Syracusano. |
| 2 | Filius noster gloriosus vir Leontius exconsule de fratre et coepiscopo nostro Leone graviter est questus nosque eius querela omnimodo turbavit, quia ita praecipitanter et leviter ab episcopo agi non debuit. |
| 3 | Quam causam subtiliter exsequendam venienti Romano defensori commisimus. |
| 4 | De vestra autem fraternitate qui ab eo directus est queritur, quod Archelai viri clarissimi medici defensione fratris et coepiscopi nostri Domitiani metropolitae utilitas gravetur. |
| 5 | Et quidem tueri iuste filios suos, vel, sicut est, forte sanctae Ecclesiae negotia, fraternitas vestra debet, et nullam occasionem dare adversariis maledicti gratia. |
| 6 | Quod tamen vos per omnia custodire etiam ista loquendo non ambigo; eidem tamen Romano venienti etiam de hac causa iniunximus, ut vobiscum debeat quae sunt recta disponere. |