Gregorius Magnus, Epistolae, 8, EPISTOLA XIII. AD COLUMBUM. Paulum episcopum commendat.
| 1 | Gregorius Columbo episcopo Numidiae. |
| 2 | Qualiter de fraternitatis vestrae debeamus charitate praesumere, ex mentis nostrae quam circa vos habemus qualitate colligimus. |
| 3 | Nec aliter vos apostolicam sedem diligere quam ipsa vos diligit arbitramur. |
| 4 | Unde necesse est ut eos quos in Ecclesia beati Petri apostolorum principis, ut oportet, devotos esse cognoscimus, vobis, cuius vitam et actio sacerdotis ornat et dignitas, peculiarius commendemus, de cuius scilicet sinceritate firmum experimentum de praeteritis iam tenemus. |
| 5 | Frater igitur et coepiscopus noster Paulus, praesentium portitor, quantis illic fluctibus, quantisque adversitatibus quatiatur, sanctitatem vestram memorat non latere. |
| 6 | Qui quoniam querelas quas de eo ad vos pervenisse signastis non veras esse, sed instigatione adversantium contra se asserit excitari, et omnia se fidit, patrocinante veritate, vobis cognoscentibus, adiutore posse Domino superare, hortamur, dilectissime frater, ut ei in quibus fuerit iustitiae ratio manifesta, manum decenter praebere solatii atque sacerdotali eum compassione debeas adiuvare. |
| 7 | Nulla ergo vos res ab aequitatis studio, nulla suspendat potentia personarum. |
| 8 | Sed innitens praeceptis dominicis, omnia quae sunt rectitudini adversa contemne. |
| 9 | In defendendis partibus iustitiae constanter insiste. |
| 10 | Odia pro veritate, si qua sunt, sustinere non renuas; ut tanto maiorem in adventu Redemptoris nostri fructum mercedis invenias, quanto eius mandata non negligens, in favorem te iustitiae et defensionem impenderis. |
| 11 | Mense Martio, indictione prima. |
| 12 | (Vide sup. l. VI, ep. 61; l. VII, ep. 2; et huius lib. ep. 12.) |