Gregorius Magnus, Epistolae, 7, EPISTOLA PRIMA. AD FORTUNATUM EPISCOPUM. Uxorem, quae libera approbata est, viro suo restituat; neque hic de illa iterum abiicienda cogitet.
| 1 | Gregorius Fortunato episcopo Neapolitano. |
| 2 | Cuius rei causa (Grat. 29, q. 2, c. 6) cum matre sua huc compulsa anno praeterito praesentium venerit latrix, fraternitas tua cautius novit. |
| 3 | Quam quia maritus suus, vester clericus, ob hoc quod de servili fuerat conditione pulsata, a suo noscitur removisse consortio, vosque hic positos asserunt promisisse ut si probare se liberam, adiuvante Domino, valuisset, suo eam vos coniugi reformare; fraternitas vestra cognoscat quod, revelante Deo, libertatis auctore, approbata sit libera, nullaque servilis in ea macula inventa. |
| 4 | His ergo cognitis, sine mora aliqua, suo per vos eam volumus marito restitui, nec ulterius idem vir eius argumenta sibi occasionis exquirat quibus eam possit abiicere. |
| 5 | Nam si a vobis, quod non credimus, minime fuerit adimpletum, eamque recipere forte distulerit, nos illud cognoscatis cum districta vindicta correcturos. |