Gregorius Magnus, Epistolae, 1, EPISTOLA LXXVIII. AD LEONEM EPISCOPUM IN CORSICA. Visitationem iniungit Saonensis Ecclesiae.
| 1 | Gregorius Leoni episcopo in Corsica. |
| 2 | Pastoralis nos cura constringit Ecclesiae sacerdotis moderamine destitutae sollicita consideratione concurrere. |
| 3 | Et quoniam Ecclesiam Saonensem ante annos plurimos, obeunte eius pontifice, omnino destitutam agnovimus, fraternitati tuae visitationis eius operam duximus iniungendam, quatenus tuis dispositionibus eius possit utilitas profligari. |
| 4 | In qua etiam Ecclesia vel eius parochiis diaconos atque presbyteros tibi concedimus ordinandi licentiam. |
| 5 | De quibus tamen tui sit studii diligentius perscrutari, ut eorum personae a sacris nullo modo canonibus respuantur. |
| 6 | Sed quos fraternitas tua tanto dignos ministerio perspexerit, eorumque mores et actus huic ordinationi concordare cognoverit, eos auctoritatis nostrae permissione ad praedictum promoveat licenter officium. |
| 7 | Cunctis igitur rebus superscriptae Ecclesiae ut proprium te volumus uti pontificem, usque ad secundam nostram epistolam. |
| 8 | Ita ergo in omnibus his diligens esto ac sollicitus, ut tua dispositione utilitates ecclesiasticae salubriter modis omnibus Deo valeant auctore disponi. |