Gregorius Magnus, Epistolae, 1, EPISTOLA XXXIX. AD ANTHEMIUM SUBDIACONUM. De neglectis pauperibus eum arguit. Domnis Pateriae, Palatinae et Vivianae largum et liberale subsidium offerri iubet.
| 1 | Gregorius Anthemio subdiacono. |
| 2 | Discedenti tibi mandavimus, et postmodum praeceptis discurrentibus iniunxisse me memini, ut curam pauperum gereres. |
| 3 | Et si quos illic egere cognosceres, scriptis recurrentibus indicares, et vix de paucis haec facere curasti. |
| 4 | Volo autem ut domnae Pateriae thiae meae, mox ut praesentem iussionem susceperis, offeras ad calciarium puerorum solidos quadraginta, et tritici modios quadringentos. |
| 5 | Domnae Palatinae relictae Urbici, solidos viginti, et tritici modios trecentos. |
| 6 | Domnae Vivianae relictae Felicis, solidos viginti, et tritici modios trecentos. |
| 7 | Qui omnes simul octoginta solidi in tuis rationibus imputentur. |
| 8 | Summam vero pensionis sub festinatione adducito, et ad paschalem diem, Domino auxiliante, occurrito. (Cf. Ioan. Diac. l. II, c. 55.) |