Gregorius Magnus, Epistolae, 1, EPISTOLA XIV. AD DEMETRIUM EPISCOPUM NEAPOLITANUM. Ut quosdam prius in fide dubios, iam vero catholicam communionem repetentes excipiat.
| 1 | Gregorius Demetrio episcopo Neapolitano. |
| 2 | Stephanus praesentium portitor, cum de quibusdam fidei capitulis eius a via veritatis nutaret intentio, pro huius rei dubietate a catholicae se ecclesiae communione suspenderat, donec eum Deus, veritatis iudex, ad viam rectitudinis revocaret, quem recepta satisfactione in fide catholica communicasse cognoscas. |
| 3 | Sed quia eum quosdam dubietatis suae socios ibidem in Neapolitana civitate habere comperimus, hoc nobis de his quoque praefatus Stephanus pollicitus esse dignoscitur; ut si eorum ambiguitatem animae nostrae interpositionis periculo sanaremus, ipsos etiam ad communionem catholicam sine mora posse vel replicatione converti. |
| 4 | Pro qua re praesentibus epistolis admonemus, nostra fide, nostroque sicut ipsi videntur, poposcisse periculo, eos in fidem catholicam communionemque suscipite, quibus potestis modis ad lucem de tenebris revocate. |
| 5 | Ne postquam ad nos huiusmodi causa perlata est, si silentio praeterimus, de animabus eorum, negligentiae possimus subire iacturam. |