Cassianus, De coenobiorum institutis, 8, CAPUT XXI Remedia quibus iram de cordibus nostris eradicare possimus.
| 1 | Quapropter athletam Christi legitime decertantem, iracundiae motus radicitus oportet evellere. |
| 2 | Cuius morbi haec erit medicina perfecta, ut primitus credamus nullo modo sive iustis, sive iniustis ex causis licere nobis irasci: scientes nos discretionis lumen, rectique consilii firmitatem, ipsam quoque honestatem, et iustitiae moderamina protinus amissuros, si principale cordis nostri lumen eius fuerit tenebris obscuratum: tum deinde puritatem mentis nostrae mox perturbandam, templumque eam sancti Spiritus effici omnino non posse iracundiae in nobis spiritu commorante. |
| 3 | Postremo, ut cogitemus, nequaquam licere nobis orare, nec iratos fundere preces ad Deum. |
| 4 | Et prae omnibus incertum statum conditionis humanae prae oculis habentes, quotidie nos credamus e corpore migraturos, nihilque nobis continentia castitatis, nihil abrenuntiatione omnium facultatum, nihil divitiarum contemptu, nihil ieiuniorum vigiliarumque laboribus conferendum, quibus propter iracundiam solam et odium ab universitatis iudice supplicia promittuntur aeterna. |