Cassianus, De coenobiorum institutis, 6, CAPUT II. De principali remedio adversus spiritum fornicationis.
| 1 | Principaliter enim vitii huius correctio de cordis perfectione descendit, ex quo etiam huius morbi virus Domini voce prodire signatur. |
| 2 | De corde, inquit, exeunt cogitationes malae, homicidia, adulteria, fornicationes, furta, falsa testimonia (Matth. XV), etc. |
| 3 | Illud ergo est primitus expiandum, unde fons vitae et mortis manare cognoscitur, dicente Salomone: Omni custodia serva cor tuum, ex his enim sunt exitus vitae (Proverb. IV). |
| 4 | Caro enim eius arbitrio atque imperio famulatur, et idcirco summo studio parcimonia ieiuniorum sectanda est, ne escarum abundantia referta caro, praeceptis animae salutaribus adversata, rectorem suum spiritum deiiciat insolescens. |
| 5 | Caeterum si omnem summam in castigatione tantum corporis collocemus, anima non similiter a caeteris vitiis ieiunante, nec meditatione divina et spiritalibus studiis occupata, nequaquam ad illud sublimissimum verae integritatis fastigium poterimus ascendere, illo quod in nobis est principale, puritatem corporis nostri infestante. |
| 6 | Oportet ergo nos mundare prius, iuxta sententiam Domini, id quod intus est calicis et paropsidis, ut fiat et id quod deforis est, mundum (Matth. XXIII). |