Cassianus, De coenobiorum institutis, 5, CAPUT XXII. Quod idcirco nos oporteat exercere continentiam corporalem, ut per ipsam perveniamus ad spiritale ieiunium.
1 | Noverimus itaque nos idcirco laborem continentiae corporalis impendere, ut ad puritatem cordis hoc possumus ieiunio pervenire. |
2 | Caeterum labor a nobis impenditur incassum, si hunc quidem contemplatione finis infatigabiliter sustinemus; finem vero propter quem toleravimus afflictiones tantas, obtinere nequeamus: meliusque fuit interdictis escis animae temperasse, quam voluntariis minusque noxiis corporaliter ieiunasse. |
3 | In his enim simplex et innoxia creaturae Dei perceptio est, nihil per semetipsam habens peccati: in illis vero primitus fratrum perniciosa devoratio, de qua dicitur: Noli diligere detrahere, ne eradiceris. |
4 | Et de ira atque invidia beatus Iob dicit: Etenim stultum interficit iracundia, et parvulum occidit invidia (Iob V). |
5 | Simulque notandum, quod qui irascitur, stultus; et qui invidet, parvulus iudicetur. |
6 | Ille namque non immerito stultus iudicatur, voluntarie sibi mortem irae stimulis incitatus inducens; et hic dum livet, parvulum minoremque se probat. |
7 | Dum enim invidet, testatur maiorem esse eum cuius prosperitate cruciatur. |