Cassianus, De coenobiorum institutis, 5, CAPUT IX De mensura castigationum assumendarum, remedioque ieiunii.
1 | Summa igitur continentiae non sola temporis ratione, nec escarum qualitate tantummodo, sed ante omnia conscientiae iudicio colligenda est. |
2 | Tantum enim debet unusquisque sibi frugalitatis indicere, quantum corporeae obluctationis pugna deposcit. |
3 | Utilis quidem et omnimodis observanda est canonica ieiuniorum custodia; sed nisi hanc frugi fuerit ciborum refectio subsecuta, ad integritatis calcem non poterit pervenire. |
4 | Longorum namque ieiuniorum inedia, saturitate corporis subsequente, lassitudinem potius temporalem, quam puritatem castitatis acquirit. |
5 | Integritas quippe mentis ventris cohaeret inediae. |
6 | Non habet perpetuam castimoniae puritatem, quisquis non iugem temperantiae aequalitatem tenere contentus est. |
7 | Quamvis districta ieiunia, succedente superflua remissione, vacuantur, et in gastrimargiae vitium protinus collabuntur: Melior est rationabilis cum moderatione quotidiana refectio, quam per intervalla arduum longumque ieiunium. |
8 | Novit immoderata inedia non modo mentis labefactare constantiam, sed etiam orationum efficaciam reddere lassitudine corporis enervatam. |