1 | Illud sane prae omnibus nosse debemus, tria cogitationum nostrarum esse principia, id est, ex Deo, ex diabolo et ex nobis. Ex Deo quidem sunt, cum Spiritus sancti illustratione nos visitare dignatur, erigens nos ad sublimiorem profectum, et in quibus vel minus acquisivimus, vel desidiose agentes superati sumus, saluberrima compunctione castigat; vel cum reserat nobis coelestia sacramenta, et propositum nostrum ad meliores actus voluntatemque convertit, ut ibi, cum rex Assuerus castigatus a Domino, libros annales instigatur inquirere, quibus Mardochaei beneficia recordatus, summi eum gradu honoris exaltat, ac protinus crudelissimam super nece gentis Iudaeae sententiam revocat (Esther VI). Vel cum Propheta commemorat, Audiam quid loquatur in me Dominus Deus [Psal. LXXXIV]. Alius quoque, Et dixit, inquit, angelus qui loquebatur in me [Zach. I]. Vel cum Filius Dei venturum se una cum Patre, et mansionem apud nos facturum esse promittit [Ioan. XIV]. Et, Non estis vos, inquit, qui loquimini, sed Spiritus Patris vestri qui loquitur in vobis [Matth. X]. Et vas electionis, Experimentum eius quaeritis qui in me loquitur Christus [II Cor. XIII]? Ex diabolo vero cogitationum nascitur series, cum subvertere nos tam vitiorum oblectatione, quam etiam occultis conatur insidiis, subtilissima calliditate mala pro bonis fraudulenter ostentans, et transfigurans se nobis in angelum lucis [II Cor. XI]. Vel cum evangelista refert: Et coena facta, cum diabolus iam misisset in cor Iudae Simonis Scarioth, ut traderet Dominum [Ioan. XIII]. Et iterum: Post buccellam. inquit, introivit in illum Satanas [Ibidem]. Petrus quoque ad Ananiam, Quare, ait, tentavit Satanas cor tuum, mentiri te Spiritui sancto [Actor. V]? Et illud quod in Evangelio, et multo ante per Ecclesiastem praedictum legimus: Si Spiritus potestatem habentis ascenderit super te, locum tuum ne dimittas [Eccles. X]. Illud quoque quod dicitur ad Deum contra Achab in tertio Regum libro ex persona spiritus immundi: Egrediar et ero spiritus mendax in ore omnium prophetarum eius [III Reg. XXII]. Ex nobis autem oriuntur, cum naturaliter ea quae gerimus, vel gessimus, vel audivimus, recordamur [Vide annotationem quartam Cuychii post finem operis]. De quibus beatus David, Cogitavi, inquit, dies antiquos, et annos aeternos in mente habui, et meditatus sum nocte cum corde meo, et exercitabar, et scopebam spiritum meum [Psal. LXXVI]. Et iterum, Dominus scit cogitationes hominum, quoniam vanae sunt [Psal. XCIII]. In Evangelio quoque Dominus ad Pharisaeos, Quid cogitatis mala in cordibus vestris [Matth. IX]? |