| 1 | Apud Tharsum metropolim Ciliciae natale sanctorum martyrum Tharaci, Probi et Andronici, qui persecutione Diocletiani et Maximiano praeside longo tempore carcerali squalore afflicti sunt, et tertio diversis suppliciis exanimati. Nam nervis crudis graviter caesi, et testis asperrimis defricati, etiam papyro ardente circa ventrem et latera adusti, post mamillarum confractionem, post tormenta tibiarum, post aceti et sinapis infusionem, post obolos ignitos, post confixionem digitorum clavis acutissimis, post oculorum transpunctionem, ac linguae abscissionem, novissime in amphitheatro ursis et leonibus proiecti sunt. Sed cum nulla ex bestiis sanctorum corpora auderet attingere, Maximianus ira succensus iussit eos gladio iugulari, et corpora eorum inter corpora gladiatorum proiici. Noctu venientes fideles, et deprecantes Dominum, ut ostenderet eis sanctorum reliquias, viderunt subito velut stellam splendidam de coelo missam super singula sanctorum corpora residentem, sicque cum ingenti gaudio rapientes ea, praecedente se eiusdem stellae splendore, gloriosos Christi athletas loco aptissimo condiderunt. |