| 1 | In Bethleem Iudaeae depositio sancti Hieronymi presbyteri, cuius vita et doctrina ubique in ecclesiis Christi laudabilis exstat, quomodo divinos libros ex Hebraea lingua in Latinam transtulit, propheticosque sensu allegorico exposuit, tandem perfectam placitamque Deo post conversationem, nonagesimo octavo aetatis suae anno, apud Bethleem in pace quievit, duodecimo Honorii imperatoris anno. In Galliis castro Solodoro sanctorum martyrum Victoris et Ursi, ex gloriosa legione Thebeorum, qui iussu Maximiani tyranni, ab Hirtaco exsecutore, primo duris suppliciis excruciati, sed coelesti lumine super eos coruscante, ruentibus in terram ministris erepti sunt. Deinde in ignem missi sunt, sed veniente mox pluvia vehementi exstincta pyra, in nullo penitus sunt laesi, novissime gladio consummati sunt. |