| 1 | In Cyzico natale Faustae virginis, et Eiulasii sub Maximiano imperatore, quam idem Eiulasius, cum esset primus palatii, iussit decalvari, et radi ad turpitudinem, dein suspendi ac torqueri. Quo tempore coruscatio de coelis multos ministrorum percussit. Deinde iussit loculos afferri, et eam immissam ac fixam, quasi lignum secari mediam: sed non eam carnifices ferris laedere valebant. Inter quae stupens Eiulasius Christo credere coepit. Et hoc ubi imperatori nuntiatum est, misit praefectum, qui eum suspensum fortiter torqueret. Qui etiam iussit Faustam nudam, et sine maforte flagellatam, incarceratam, caput terebrari, ac oculos infigi, cui postmodum non solum caput et facies, sed et pectus et totum corpus usque ad tibias clavis impletum est. Post haec sartaginem iussit igniri, sed haec psallente illa refriguit. Haec interveniens vox de coelo vocavit eos, et sic tradiderunt spiritum. Erat autem Fausta annorum tredecim, et Eiulasius octoginta. Et vigilia sancti Matthaei apostoli. |