| 1 | Natale sancti Nicomedis martyris, quem Flaccus comes, eo quod corpus sanctae virginis Feliculae, quam ipse pro Christo punierat, sepelisset, iussit duci ad sacrificandum. Quo renuente, plumbatis diutissime caesus migravit ad Dominum. Cuius corpus in Tiberim iactavit, quod a clerico ipsius, nomine Iusto, est collectum, et sepultum iuxta muros via Numentana. Cabilonensi castro Trenorcio sancti Valeriani martyris, sub praeside Prisco, quem iussit suspendi, ac gravi ungularum laceratione cruciari, ac deinde gladio percuti. Et natale sancti Apri episcopi, et sancti Leobini confessoris. In Alexandria sanctorum Serapionis, Leontii. In Cyra Galatiae sancti Eleuci, Valerii et Cyrionis, Stratonis, Macrobii et Constantii. In Ancyra sancti Pauli episcopi. Lugduno depositio Albini episcopi, et octava natalis sanctae Mariae virginis. |