| 1 | Nativitas beatissimae Dei genitricis Mariae perpetuae virginis. Apud Nicomediam natale sancti Adriani martyris, cum aliis viginti tribus, quos Maximianus post innumeras poenas iussit, ut vecte ferreo magno confringerentur tibiae ipsorum. Confractis itaque cruribus, ac pedibus incisis insuper et beato Adriano incisa manu orantes et gratias agentes Deo spiritum emiserunt. Corpora eorum iussit tyrannus incendi; sed subito factae sunt coruscationes et tonitrua, ac pluviae, et exstinctus est ignis. Tunc Christiani rapientes martyrum reliquias, ascensis navibus, fugerunt Byzantium, et reverenti honore sepelierunt. Non longo post tempore beati Adriani corpus est Romam translatum. In suburbanis Moguntiacensis ecclesiae natale sancti Disboti confessoris, et Frisingae depositio sancti Corbiniani episcopi. |