| 1 | Natale sancti Timothei, qui ab Antiochia veniens Romam, sub Melchiade papa susceptus est in hospitium a Sylvestro papa, qui postea episcopus factus est. Qui cum annum totum et aliquot menses praedicans, multos ad Christum convertisset, tentus a Tarquinio urbis praefecto, et longa carceris custodia maceratus, cum sacrificare idolis noluisset, tertio caesus, et gravissimis suppliciis attrectatus, ad ultimum decollatus, et iuxta beatum Paulum apostolum sepultus est. Augustuduno sancti Simphoriani, qui tempore Aureliani imperatoris sub Heraclio consulari, cum idolis sacrificare nollet, primo verberibus afflictum, deinde carceri mancipatum, ad ultimum abscisso capite martyrio effecit. In portu Romano, sanctorum peregrinorum martyrum, Martialis, Epicteti, Saturnini, Aprilis et Felicis, cum sociis eorum. Item Romae beati Antonini martyris; qui cum esset carnifex, vidit stantem iuvenem cum spongia, et detergentem latera sanctorum martyrum Eusebii, Pontiani, Peregrini atque Vincentii, cum suspensi in equuleo caederentur, exclamare coepit: Vere Deus est Christus, quem hi praedicant; et fugiens occulte a Rufino presbytero baptizatus est; et reversus ad Vitellium cum se Christianum libere fateretur, capitali sententia damnatus, via Aurelia sepultus est. Eodem die octava Assumptionis sanctae Mariae. |