| 1 | Andegavis depositio sancti Albani episcopi. Romae sanctorum martyrum ducentorum sexaginta, temporibus Claudii, qui via Salaria arenam fodientes damnati sunt pro Christi nomine: quos iussit Claudius, ut in figlina foris muros Salariae mitterentur, et eo loco inclusi in civitatis amphitheatro, militum sagittis interficerentur. Eodem die depositio sancti Suitberti episcopi et confessoris. |