| 1 | Apud Hispaniam, in civitate Hispali, natale sancti Leandri episcopi, ad quem beatus Gregorius libros Moralium scripsit, cuius praedicatione et industria tota Visigothorum gens ab Arriana impietate conversa est. Eodem die in Alexandria natale sancti Iuliani martyris. Qui cum ita podagra esset constrictus, ut neque incedere neque stare posset, in sellula iudici offertur, cum his qui eum portabant, quorum unus negavit, alter nomine Eunus, cum Iuliano sene in confessione Christi perdurat. Quique iubente iudice camelis impositi, et per totam circumducti urbem, et flagris hinc inde inspectante populo laniati sunt, usquequo finem ipsis verberibus sortirentur. Apud Lugdunum sancti Baldimeris viri Dei. In Thessalonica natale Alexandri, Androgoni, Abundantii. In Africa Dionysii, et aliorum viginti quatuor. |