| 1 | Romae natale sancti Telesphori papae, qui septimus post Petrum apostolum pontifex ordinatus, sedit annos undecim, menses tres, dies viginti unum. Hic constituit, ut septem hebdomatibus ante Pascha ieiunium celebraretur, et in nativitate Domini nostri Iesu Christi missae nocte celebrarentur, ac hymnus angelicus, id est, Gloria in excelsis Deo, hora sacrificii missae celebretur, illustreque ad extremum sub Hadriano principe martyrium duxit. Item apud Antiochiam beati Symeonis monachi depositio, qui tertio decimo aetatis suae anno, huic saeculo abrenuntians, monasterium expetiit: ubi vix septimo die cibum sibi indulgens, psalterium infra quatuor menses didicit: postremo in columna, usque ad finem vitae suae stetit. Ierosolymae depositio Symeonis prophetae, qui Dominum Iesum in ulnis portavit. |