Beda Venerabilis, Historia Ecclesiastica Gentis Anglorum, 4, 17

monumenta.ch > Beda Venerabilis > 17
Beda, Historia Eccl. Gentis Anglorum, 4, XVI. Ut Vecta insula Christianos incolas susceperit, cuius regii duo pueri statim post acceptum baptisma sint interempti. <<< >>> XVIII. De Iohanne cantatore sedis apostolicae, qui propter docendum Britanniam venerit .

Beda Venerabilis, Historia Ecclesiastica Gentis Anglorum, 4, CAPUT XVII. De synodo facta in campo Haethfelda [Al., Hetfeld], praesidente archiepiscopo Theodoro.

1	His temporibus [DCLXXX] [Audiens. Dum synodus generalis sexta Constantinopoli sederet contra haeresin Eutychetis et Monothelitarum, Agatho papa unam Romae habuit ad declarandam Occidentalis Ecclesiae fidem, et metropolitani in suis quique provinciis per Italiam, Galliasque convocatis episcopis, suffragia sua Constantinopolim mittenda detulerunt. Hoc igitur Theodorus ex parte Anglicanae Ecclesiae hoc loco praestat. Hoc etiam Uilfridus cum Romae esset in causa appellationis coram in synodo, omnium Brittanicarum Ecclesiarum nomine, ex mera et certa sua scientia prae titit. Vide V, 20. Aliae assignantur causae huius synodi, confirmatio fundationis monasterii Medeshamsted, et bullae papalis de eadem promulgatio, de quibus Uilfridus Romam missus a Uulfheri rege Merciorum, sed de his nihil in Beda, nec quidquam ibi declaratum praeter fidei symbola. Sed seriem historiae Uilfridi vide simul positam append. n. 19.] audiens Theodorus fidem Ecclesiae Constantinopoli per haeresim Eutychetis multum esse turbatam, et Ecclesias Anglorum quibus praeerat ab huiusmodi labe immunes perdurare desiderans, collecto venerabilium sacerdotum doctorumque plurimorum coetu, cuius essent fidei singuli sedulus inquirebat, omniumque unanimem in fide catholica reperit consensum: et hunc synodalibus literis ad instructionem memoriamque sequentium commendare curavit, quarum videlicet literarum istud exordium est:
2	'In nomine Domini nostri Iesu Christi Salvatoris, imperantibus dominis piissimis nostris Ecgfrido rege Hymbronensium, anno decimo regni eius, sub die quintadecima Kalendas Octobres, indictione octava; et Aedilredo rege Mercinensium, anno sexto regni eius; et Alduulfo [Al., Aduulfo] rege Estranglorum [Al., Estanglorum], anno decimo septimo regni eius; et Hlothario rege Cantuariorum, regni eius anno septimo: praesidente Theodoro, gratia Dei archiepiscopo Brittaniae insulae, et civitatis Doruvernis; una cum eo sedentibus caeteris episcopis Brittaniae insulae viris venerabilibus, praepositis sacrosanctis Evangeliis, in loco qui Saxonico vocabulo Haethfelth [Al., Hetfeild] nominatur, pariter tractantes, fidem rectam et orthodoxam exposuimus; sicut Dominus noster Iesus Christus [Al. om. Christus] incarnatus tradidit discipulis suis, qui praesentialiter viderunt et audierunt sermones eius, atque sanctorum Patrum tradidit symbolum, et generaliter omnes sancti et universales synodi, et omnis probabilium catholicae Ecclesiae doctorum chorus.
3	Hos itaque sequentes nos pie atque orthodoxe, iuxta divinitus inspiratam doctrinam eorum professi credimus consonanter, et confitemur secundum sanctos Patres, proprie et veraciter Patrem et Filium et Spiritum sanctum Trinitatem in unitate consubstantialem, et unitatem in Trinitate, hoc est, unum Deum in tribus subsistentiis vel personis consubstantialibus, aequalis gloriae et honoris.
4	' Et post multa huiusmodi quae ad rectae fidei confessionem pertinebant, haec quoque sancta synodus suis literis addit [Al., addidit]: ' [Suscepimus. In maiorem cautelam suscipiuntur omnes synodi generales contra omnes haereses, sicut moris fuit. Huiusmodi confessionum formas ab episcopis in suo accessu factas vide Libro Diurno Rom. pont., a pag. 26 ad 52.] Suscepimus [Al., suscipimus] sanctas et universales quinque synodos beatorum et [Al. om. et] Deo acceptabilium Patrum; id est, qui in Nicaea congregati fuerunt trecentorum [Al., trecenti] decem et octo, contra Arium impiissimum et eiusdem dogmata; et in Constantinopoli centum quinquaginta, contra vesaniam Macedonii et Eudoxii et eorum dogmata; et in Epheso primo ducentorum, contra nequissimum Nestorium et eiusdem dogmata; et in Chalcedone sexcentorum [Al., ducentorum] et triginta, contra Eutychen [Al., Eutychetem] et Nestorium, et eorum dogmata; et iterum in Constantinopoli, quinto congregati sunt concilio, in tempore Iustiniani minoris, contra Theodorum [Al., Theodoretum], et Theodoreti et Ibae epistolas et eorum dogmata contra Cyrillum.
5	' Et paulo post: 'Et synodum quae facta est in urbe Roma, in tempore [Martini. Additur haec synodus quia directe celebrata est contra eos qui unam in Christo operationem et voluntatem praedicabant. Vide caput proxime sequens.] Martini papae beatissimi, indictione octava, imperante Constantino piissimo anno nono. Suscepimus et glorificamus Dominum nostrum Iesum, sicut [Al. add. et] isti glorificaverunt; nihil addentes vel subtrahentes: et anathematizamus corde et ore quos anathematizarunt; et quos susceperunt, suscepimus: glorificantes Deum Patrem sine initio, et Filium eius unigenitum ex Patre generatum ante saecula, et Spiritum sanctum procedentem ex Patre et Filio inenarrabiliter, sicut praedicaverunt hi quos memoravimus supra, sancti apostoli, et prophetae, et doctores.
6	Et nos omnes subscripsimus [Al., subscribimus], qui cum Theodoro archiepiscopo fidem catholicam exposuimus.'